यु–१९ विश्वकपमा नेपालको तथ्याङ्क

अस्ट्रेलियामा शनिबार सुरु हुने आइसिसी यु–१९ विश्वकप क्रिकेटमा नेपालको प्रदर्शन तथ्यांकमा। नेपालले यु–१९ विश्वकपमा छैटौंपटक सहभागिता जनाउन लागेको हो। यसअघिका पाँच सहभागितामा नेपाल र नेपाली खेलाडीले गरेको प्रदर्शन।

– नेपालले आइसिसी यु–१९ विश्वकपमा पहिलो खेल दक्षिण अफ्रिकाविरुद्ध सन् २००० मा श्रीलंकाको कटुनायकेस्थित एयरफोर्स मैदानमा खेलेको थियो। दक्षिण अफ्रिकाले ५ विकेट गुमाई बनाएको २ सय ९५ रन नेपालले यु–१९ विश्वकपमा खर्चेको सबैभन्दा बढी रन हो। वर्षाले प्रभावित भएपछि रद्ध भएको थियो।
– नेपालले यु–१९ विश्वकपमा पछिल्लो खेल २००८ मा मलेसियामा वेस्ट इन्डिजविरुद्ध प्लेट च्याम्पियनसिप फाइनल थियो। ७ विकेटले पराजित भएको सो खेलमा नेपालले ७४ रनमात्र बनाउन सकेको थियो। यु–१९ विश्वकपमा नेपालको यो न्युन स्कोर हो।
–  २००६ मा आयरल्यान्डविरुद्ध ८ विकेट गुमाई २ सय ३४ रन बनाउनु नेपालको सर्वाधिक स्कोर हो।
– २००२ को प्लेट फाइनलमा जिम्बावेले नेपाललाई १ सय ३७ रनले पराजित गरेको थियो, जुन रनको अन्तरमा नेपालको सबैभन्दा ठूलो हार हो। जिम्बावेलाई नै २००८ को प्लेट क्वार्टरफाइनलमा ९९ रनले पराजित गर्नु नेपालको सबैभन्दा ठूलो रन अन्तरको जित हो।
– कनिष्क चौंगाईले पपुवा न्युगिनीविरुद्ध बनाएको ९० रन यु–१९ विश्वकपमा नेपाली खेलाडीको व्यक्तिगत उच्च स्कोर हो। कनिष्क र शरद भेषावकरले सबैभन्दा बढी ३–३ तथा शक्ति गौचनले दुई अर्द्धसतक बनाएका छन्।
– नेपाललाई २००६ को प्लेट च्याम्पियनसिपको उपाधि दिलाउने क्रममा कनिष्कले २ सय ३४ रन बनाएका थिए। उनी एकै विश्वकपमा सर्वाधिक रन बनाउने नेपाली खेलाडी हुन्। मन्जित श्रेष्ठले २००४ मा १४ विकेट लिई एकै विश्वकपमा सर्वाधिक विकेट लिने नेपाली खेलाडी बनेका थिए।
– लाक्पा लामाले २००२ मा पपुवा न्युगिनीविरुद्ध १० ओभरमा ३ मेडन राख्दै १४ रन खर्चेर ४ विकेट लिएको प्रर्दशन यु–१९ विश्वकपमा नेपाली खेलाडी उत्कृष्ट प्रदर्शन हो। सबैभन्दा किफायती बलिङ गर्ने शक्ति गौचन हुन्। उनले १४ खेलमा २.६७ को इकोनोमीमा १३ विकेट लिएका छन्।
– २००२ मा बरदान चालिसे (२३१ रन ७ विकेट), विनोद दास (१३१ रन ११ विकेट), शक्ति गौचन (११६ र १० विकेट ), २००४ मा शक्ति गौचन (१७१ रन ७ विकेट), २००६ मा बसन्त रेग्मी (१४१ रन १२ विकेट), २००८ मा पारस खड्का (११३ रन १२ विकेट) विश्वकपमा नेपाली खेलाडीको उत्कृष्ट अलराउन्ड प्रदर्शन हो।

नागरिक राष्ट्रिय दैनिकमा साउन २६ गते प्रकासित